ടോക്യോ: ഗ്രൂപ്പ്​ ഘട്ടത്തില്‍ തകര്‍ത്തു വിട്ടതിന്‍റെ ആത്​മവിശ്വാസവുമായി എത്തിയ ഗ്രേറ്റ്​ ബ്രിട്ടനെ വിറപ്പിച്ചുവിട്ട്​ ഇന്ത്യന്‍ വനിതകള്‍. ഒളിമ്ബിക്​സ്​ ഹോക്കിയിലെ വെങ്കല മെഡല്‍ മത്സരത്തില്‍ 4-3 എന്ന സ്​കോറിന്​ ഇന്ത്യ അടിയറവ്​ പറഞ്ഞത്​. പേരും പെരുമയുമായെത്തിയ ബ്രിട്ടനെ തെല്ലും കൂസാതെയാണ്​ മത്സരത്തിലുടനീളം ഇന്ത്യന്‍ ടീം കളിച്ചത്​. കളിയില്‍ രണ്ട്​ ഗോളിന്​ ബ്രിട്ടന്‍ മുന്നിലെത്തിയെങ്കിലും മൂന്ന്​ ഗോള്‍ തിരിച്ചടിച്ച്‌​ ലീഡെടുത്തതിന്​ ശേഷമാണ്​ ഇന്ത്യ പരാജയം സമ്മതിച്ചത്​​.

രണ്ടാം ക്വാര്‍ട്ടറിന്‍റെ തുടക്കത്തില്‍ തന്നെ ഗോള്‍ നേടി ബ്രിട്ടന്‍ മുന്നിലെത്തി. രണ്ടാം ക്വാര്‍ട്ടറില്‍ തന്നെ രണ്ടാമത്തെ ഗോളും സ്​കോര്‍ ചെയ്​ത്​ ലീഡുയര്‍ത്തിയതോടെ ഇന്ത്യന്‍ വനിതകള്‍ സമ്മര്‍ദത്തിലായി.

എന്നാല്‍ സമ്മര്‍ദത്തിന്​ വഴങ്ങാതെ ഗുര്‍ജിത്​ കൗറിലൂടെ ഇന്ത്യ ഒരു ഗോള്‍ തിരിച്ചടിച്ചു. രണ്ടാം ക്വാര്‍ട്ടറില്‍ തന്നെ ഇന്ത്യ ബ്രിട്ടനുമായി സമനില പിടിച്ചു. ഗുര്‍ജിത്​ കൗര്‍ തന്നെയായിരുന്നു രണ്ടാം ഗോളും നേടിയത്​. പിന്നീട്​ മൂന്നാം ഗോളും നേടി ബ്രിട്ടനെതിരെ ഇന്ത്യ ലീഡടെുത്തു. എന്നാല്‍, നാലാം ക്വാര്‍ട്ടറിന്‍റെ തുടക്കത്തില്‍ തന്നെ ഗോള്‍ നേടി ബ്രിട്ടന്‍ നിര്‍ണായകമായ ലീഡും മത്സരവും തിരിച്ചു പിടിച്ചു.

മുന്‍ ചാമ്ബ്യന്‍മാരായ ബ്രിട്ടന്‍ അനായാസമായി ഇന്ത്യയെ കീഴടക്കാമെന്ന്​ മനസിലുറപ്പിച്ച്‌​ തന്നെയാണ്​ വെങ്കല്‍ മെഡല്‍ പോരാട്ടത്തിനായി എത്തിയത്​. എന്നാല്‍, 130 കോടി ജനങ്ങളുടെ പ്രതീക്ഷയുമായി കളത്തിലിറങ്ങിയ ഇന്ത്യക്ക്​ അത്ര പെ​ട്ടെന്ന്​ ബ്രിട്ടന്​ മുന്നില്‍ അടിയറവ്​ പറയാന്‍ സാധിക്കുമായിരുന്നില്ല. ആസ്​ട്രേലിയ അടക്കമുള്ള വമ്ബന്‍മാരെ മുട്ടുകുത്തിച്ചെത്തിയ ഇന്ത്യ ആ പെരുമക്കൊത്ത പ്രകടനം ബ്രിട്ടനെതിരെയും പുറത്തെടുത്തു. അവസാന മത്സരഫലത്തില്‍ ഇന്ത്യ പിന്നിലായെങ്കിലും വനിത ഹോക്കിയിലെ പുതുയുഗപ്പിറവിക്ക്​ തുടക്കമിട്ടാണ്​ അവര്‍ ടോക്യോയില്‍ നിന്നും മടങ്ങുന്നത്​.