ദുബായ്: പ്രവാസികളുമായി ആശയവിനിമയം നടത്തുന്നതിനും അടിയന്തര സന്ദേശങ്ങള്‍ കൈമാറുന്നതിനുമായി തയ്യാറാക്കിയ ഗ്ലോബല്‍ പ്രവാസി റിഷ്ത പോര്‍ട്ടലില്‍ ദുബായിലും വടക്കന്‍ എമിറേറ്റുകളിലുമുള്ള എല്ലാ ഇന്ത്യന്‍ പ്രവാസികളും രജിസ്റ്റര്‍ ചെയ്യണമെന്ന് ദുബായ് ഇന്ത്യന്‍ കോണ്‍സുലേറ്റ് ട്വിറ്ററില്‍ അറിയിച്ചു.

3.1 കോടിയിലേറെ വരുന്ന ലോകത്തെമ്പാടുമുള്ള ഇന്ത്യന്‍ പ്രവാസി സമൂഹവുമായി സംവദിക്കാന്‍ കേന്ദ്ര ആഭ്യന്തര മന്ത്രാലയം തയ്യാറാക്കിയതാണ് ഗ്ലോബല്‍ പ്രവാസി രിഷ്ത. യുഎഇയിലെ 34 ലക്ഷം പ്രവാസികള്‍ക്ക് അടിയന്തര വിവരങ്ങള്‍ ലഭിക്കാനും അധികൃതരുമായി ബന്ധപ്പെടാനും ഇതിലൂടെ സാധിക്കും. പ്രവാസികള്‍ക്ക് ഇന്ത്യന്‍ വിദേശകാര്യ മന്ത്രാലയവുമായും യുഎഇയിലെ എംബസി-കോണ്‍സുലേറ്റുകളുമായും ലോകത്തിന്റെ വിവിധ ഭാഗങ്ങളിലുള്ള പ്രവാസികളുമായും ഇതിലൂടെ ആശയ വിനിമയം സാധ്യമാവുമെന്നതാണ് പോര്‍ട്ടലിന്റെ പ്രത്യേകത.

പ്രവാസികളുമായി ബന്ധപ്പെട്ട പ്രധാന വിവരങ്ങളെല്ലാം ലഭിക്കുന്ന ഈ പോര്‍ട്ടല്‍ വഴി പ്രവാസികള്‍ക്ക് തങ്ങളുടെ ഏത് പ്രശ്‌നവും അധികൃതരുടെ ശ്രദ്ധയില്‍ കൊണ്ടുവരാന്‍ സാധിക്കുമെന്നും കോണ്‍സുലേറ്റ് വക്താവ് പറഞ്ഞു. യുഎഇയിലെ മുഴുവന്‍ ഇന്ത്യന്‍ പ്രവാസികളും പോര്‍ട്ടലില്‍ രജിസ്റ്റര്‍ ചെയ്യണം. യുഎഇ പ്രവാസികളുടെ ഡാറ്റ ബേസ് ഇതുവരെ പൂര്‍ണമായ രീതിയില്‍ ലഭ്യമായിട്ടില്ലെന്നും പോര്‍ട്ടല്‍ രജിസ്‌ട്രേഷന്‍ വഴി അത് ലഭിക്കുമെന്നാണ് കരുതുന്നതെന്നും അദ്ദേഹം കൂട്ടിച്ചേര്‍ത്തു.

ഒരു രാജ്യത്ത് നിന്ന് മറ്റൊരിടത്തേക്ക് നീങ്ങുമ്പോള്‍ പുതിയ സ്ഥലത്ത് വച്ച് പോര്‍ട്ടലിലെ വിവരങ്ങള്‍ അപ്‌ഡേറ്റ് ചെയ്യണമെന്നും അധികൃതര്‍ അറിയിച്ചു. അടിയന്തര സന്ദേശങ്ങള്‍ക്കു പുറമെ, പ്രവാസികള്‍ ശ്രദ്ധിക്കേണ്ട കാര്യങ്ങള്‍, ഇന്ത്യന്‍ എംബസിയുടെയും കോണ്‍സുലേറ്റിന്റെയും പ്രവര്‍ത്തനങ്ങളെ കുറിച്ചുള്ള അപ്‌ഡേറ്റുകള്‍, പ്രവാസികള്‍ക്കായി സര്‍ക്കാര്‍ പ്രഖ്യാപിക്കുന്ന പദ്ധതികളെയും സ്‌കീമുകളെയും കുറിച്ചുള്ള വിവരങ്ങള്‍ തുടങ്ങിയ അപ്പപ്പോള്‍ ലഭിക്കുമെന്ന സൗകര്യവും പോര്‍ട്ടിലിലുണ്ട്.