Bright Eyes Gladden The Heart; Good News Puts Fat On The Bones. (Proverbs 15:30)
പ്രമുഖ വ്യവസായിയും, മുത്തൂറ്റ് ഗ്രൂപ്പ് ചെയര്മാനുമായ എം ജി ജോര്ജ്ജ് മുത്തൂറ്റ് അന്തരിച്ചു. 71 വയസായിരുന്നു. വാര്ധക്യ സഹജമായ അസുഖങ്ങളെ തുടര്ന്ന് വീട്ടില് വിശ്രമത്തിലായിരുന്നു. പടിക്കെട്ടിറങ്ങുന്നതിനിടെ വീണ് പരിക്കേറ്റ അദ്ദേഹത്തെ ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല. ദില്ലിയിലെ സ്വകാര്യ ആശുപത്രിയില് മൃതദേഹം സൂക്ഷിച്ചിരിക്കുകയാണ്. മുത്തൂറ്റ് ഗ്രൂപ്പ് സ്ഥാപനങ്ങളുടെ ചെയര്മാനായ ജോര്ജ് ഓര്ത്തഡോക്സ് സഭ ട്രസ്റ്റി, ഫിക്കി കേരള ഘടകം ചെയര്മാന് എന്നീ നിലകളില് പ്രവര്ത്തിച്ചിട്ടുണ്ട്.
2011ല് ഫോര്ബ്സ് ഏഷ്യാ മാഗസിന് ഇന്ത്യയിലെ 50 സമ്പന്നരുടെ പട്ടികയില് ഉള്പ്പെട്ട ജോര്ജ്ജ് മുത്തൂറ്റ് 2020ലെ കണക്കനുസരിച്ച് കേരളത്തിലെ എറ്റവും സമ്പന്നനായ വ്യക്തിയാണ്. മണിപ്പാല് ഇന്സ്റ്റിറ്റ്യൂട്ട് ഓഫ് ടെക്നോളജിയില് നിന്ന് മെക്കാനിക്കല് എന്ജിനീയറിങ് ബിരുദം നേടിയ ജോര്ജ്ജ് മുത്തൂറ്റ് 1979ലാണ് കുടുംബ ബിസിനസായ മുത്തൂറ്റ് ഗ്രൂപ്പിന്റെ മാനേജിങ് ഡയറക്ടറായി സ്ഥാനമേറ്റത്. 1993 ല് ഗ്രൂപ്പിന്റെ ചെയര്മാനായി. ഫെഡറേഷന് ഓഫ് ഇന്ത്യന് ചേംബേഴ്സ് ഓഫ് കോമേഴ്സ് ആന്ഡ് ഇന്ഡസ്ട്രി (എഫ്ഐസിസിഐ - ഫിക്കി) എക്സ്ക്യൂട്ടീവ് അംഗമായും ഫിക്കി കേരള സ്റ്റേറ്റ് കൗണ്സില് ചെയര്മാനായും പ്രവര്ത്തിച്ചിട്ടുണ്ട്.
ന്യൂഡല്ഹിയിലെ സെന്റ് ജോര്ജ്സ് ഹൈസ്കൂള് ഡയറക്ടര് സാറ ജോര്ജ് മുത്തൂറ്റാണ് ഭാര്യ. മുത്തൂറ്റ് ഗ്രൂപ്പ് എക്സിക്യൂട്ടീവ് ഡയറക്ടര് ജോര്ജ് എം. ജോര്ജ്, ഗ്രൂപ്പ് ഡയറക്ടര് അലക്സാണ്ടര് ജോര്ജ്, പരേതനായ പോള് മുത്തൂറ്റ് ജോര്ജ് എന്നിവരാണ് മക്കള്.