Bright Eyes Gladden The Heart; Good News Puts Fat On The Bones. (Proverbs 15:30)
തിരുവനന്തപുരം: ദത്ത് കേസില് അനുപമയുടെ മാതാപിതാക്കള് ഉള്പ്പെടെ 6 പ്രതികള്ക്ക് മുന്ജാമ്യം നല്കരുതെന്ന് പൊലീസ്.
കുഞ്ഞിനെ തട്ടി കൊണ്ടുപോയതിനും വ്യാജരേഖയുണ്ടാക്കിയതിനും അന്വേഷണം തുടരുകയാണെന്നും ഇപ്പോള് ജാമ്യം നല്കിയാല് സ്വാധീനമുളള പ്രതികള് തെളിവ് നശിപ്പിക്കുമെന്നുമുള്ള റിപ്പോര്ട്ട് പൊലീസ് കോടതിയില് സമര്പ്പിച്ചു. ഇന്ന് മുന്കൂര് ജാമ്യാപേക്ഷ പരിഗണിക്കുന്നതിന് മുന്നോടിയായാണ് പൊലീസ് റിപ്പോര്ട്ട് നല്കിയത്. നേരത്തെ കോടതി വിഷയത്തില് പൊലീസിന്റെ അഭിപ്രായം തേടിയിരുന്നു. അനുപമയുടെ അച്ഛന് ജയചന്ദ്രന്, അമ്മ സ്മിത അച്ഛന്റെ സുഹൃത്തുക്കള് അടക്കമുള്ള ആറ് പ്രതികളാണ് തിരുവനന്തപുരം ജില്ലാ കോടതിയില് മുന് കൂര് ജാമ്യാപേക്ഷ അപേക്ഷ നല്കിയത്.
അതേസമയം കേസില് ശിശുക്ഷേമ സമിതിയിലെ സിസിടിവി പരിശോധിക്കാന് തീരുമാനം. സര്ക്കാരിന്്റെ വകുപ്പ് തല അന്വേഷണത്തിന്്റെ ഭാഗമായാണ് ഈ പരിശോധന. വനിതാ ശിശു വികസന ഡയറക്ടര് ശിശുക്ഷേമ സമിതിക്ക് നോട്ടീസ് നല്കിയിട്ടുണ്ട്. കുഞ്ഞിനെ കൈമാറിയെന്ന് പറയുന്ന 2020 ഒക്ടോബറിലെ ദിവസങ്ങളിലെ സിസിടിവി ഹാജരാക്കാനാണ് നോട്ടീസ് നല്കിയത്. സിസിടിവി നശിപ്പിച്ചെന്ന് ജീവനക്കാരുടേതെന്ന പേരില് പുറത്തുവന്ന ഒരു കത്തിലും ആരോപണം ഉണ്ടായിരുന്നു. കുഞ്ഞിനെ അമ്മത്തൊട്ടിലില് ഉപേക്ഷിച്ചതാണോ അല്ലയോ എന്ന് കണ്ടെത്താന് സിസിടിവി ദൃശ്യങ്ങള് നിര്ണായകമാണ്.